Најпродаваниот автор на Балканот, Јелена Бачиќ Алимпиќ го освои срцето на македонската публика со триологијата, Казна за гревот.
И како тоа да беше доволно, не воодушеви со Последната пролет во Париз и ни го заврти паметот со феноменалниот роман, Рингишпил, една од омилените на многу љубители на пишаниот збор.
Ја знаевме како водителка, новинар и уредник во многу медиуми, а денес ја препознаваме како еден од најдобрите српски автори кои никој не оставила рамнодушен со своето раскажување.
Нејзините книги се полни со емоции кои не ви оставаат друг избор, освен да се соживеете со ликовите. Доколку се уште немате слушнато за неа, или сте слушнале, но се двоумите дали да и дадете шанса, ова се нејзините највпечатливи книги кои ќе ве воодушеват.
1. Последната пролет во Париз
Во овој роман се раскажува емотивната приказна за живототна емигрантите од царска Русија, за предавството, верноста кон идеолошките вредности, за вистината и како да се прифатиме и осознаеме себеси онакви какви што сме навистина.
Една од речениците кои ќе ви остави впечаток е следната. “Трагедијата на животот не е смртта, туку сето она што умрело во нас додека сме живееле.”
Неверојатната Бачиќ раскажува за Виктор, маж кој хероината во книгата го љубела како никој досега. Раскажува за онаа љубов која се доживува само еднаш во животот. Раскажува за младоста и како тој бил светлината која ја водела низ темните времиња.
Романот започнува со писмото на старицата Марија Колчак, штитеничка на санаториум во Тулон, испратено до млада новинарка која работи за угледен париски весник.
Писмото ќе ја заинтригира Олга Ласеж толку многу, што ќе одлучи да ја посети старицата и да ја слушне нејзината приказна исткаена од страдања доживеани за време на Втората Светска војна.
Ќе уживате во раскажувањето на Бачиќ за врската која се формира помеѓу двете жени.
Таа навлегува во детали за животот на Олга, новинарката омажена за бизнисменот Ејтен со кој има несреќен живот. Ако краткиот вовед ве заинтригира, не двоумете се да ја купите или зајмите книгата уште денес.
2. Ноќта кога дојдоја сватовите
Ако живеете на Балканот, не е возможно да немате слушнато за емотивната, трогателна и романтична триологија, Казна за гревот.
Првата книга е Ноќта кога дојдоја сватовите, која ја освои македонската публика, во буквална смисла на зборот. Дејствието се случува на имотот на гроф Ерцег кон почетокот на 20 век во мало зафрлено гратче во срцето на Бачка.
Михајно е син на грофот. Емилија е ќерка на ковач, кој заедно со семеството живее на имотот на грофот. Михајло и Емилија растат заедно и со текот на времето стануваат блиски пријатели.
Но, нивната платонска љубов полека преминува во страсна љубов која и двајцата не можат да ја игнорираат. Сепак, ноќта кога ќе дојдат сватовите, ќе се промени се.
3. Книга на спомените
Овој роман е втор по ред од триологијата, Казна за гревот.
Оние кои го сакаат пишаниот збор на Бачиќ, се воодушевени од вториот дел, повеќе отколку од првиот и го опишуваат како повозбудлив и пошармантен.
Првиот дел наликува на клише приказна, додека во вториот се обработуваат тешки и мрачни теми, како нацизмот и Втората Светска војна. Сепак, ќе се сретнете и со некои романтични, меланхолични моменти кои ќе ве растажат, но сепак ќе ве направат да се гордеете со хероината, односно младата Емилија која за прв пат ќе зачекори во вистинскиот свет.
Емилија е паметна девојка со голем потенцијал кој ќе биде забележан. Охрабрена, таа ќе го напушти имотот и ќе зачекори во голем град во Австрија, каде ќе се образова на еден од најпрестижните универзитети.
Благодарение на нејзината остроумност, ќе му стане асистентка на еден од најугледните универзитетски професори во градот. И токму тогаш, нејзината стара љубов ќе се појави во нејзиниот живот повторно.
4. Молитва за прошка
Последниот дел од триологијата продолжува да се врти околу животите на нашите омилени ликови, Михајло и Емилија кои сеуште не можат да ја преболат љубовта која можеле да ја уживаат.
Но, се чини како животот да оди секогаш против нив. Доколку се гордеевте на Ема во вториот дел, ќе се гордеете уште повеќе со неа во последниот дел, бидејќи тука станува поуспешна од Михајло, по преселувањето во Виена.
Добива работа како професорка и се мачи со болеста на нејзиниот сопруг. Додека пак Михајло гние на својот имот.
Некои мислат дека Бачиќ има подобри дела од оваа книга, и триологијата во целост, додека пак други ја опишуваат книгата како незаборавна. Во целост, има многу што да се научи од сите три дела.
5. Рингишпил
Кога ќе ја земете во раце оваа книга, бидете подготвени за едно многу емотивно вртење на рингишпилот на баба Дара. Македонските читатели се воодушевени од книгата. И јас ја прочитав пред неколку години.
Но, не се сеќавам на сите детали, па затоа си зедов за слобода да читам рецензии напишани од читателите и да ги споделам нивните импресии. Книгата се чита во еден здив.
Ќе ве натера да се соживеете со ликовите. Ќе се чувствувате како да ги доживувате работите кои ги доживувале тие. Главната хероина на книгата е Ана Балинт, балерина со тажна приказна која одлучува да ја раскажи на смртната постела, пред да замине во нејзиното вечно почивалиште.
Секој лик има своја приказна и ќе ве освои на свој начин. Ако еднаш ја прочитате оваа книга, ќе се навратите на неа уште многу пати.